Арыста 945 бала табылды

2019 жылдың 24 маусымы, 23:00-дегі ҚР БҒМ баспасөз хабарламасы бойынша, ҚР БҒМ Білім және ғылым саласын бақылау департаменті, білім беру басқармасы және қоғамдық ұйымдар өкілдерінен тұратын мобильді топ 945 баланы тауып, ата-аналарына тапсырды, тағы 14 ата-ананы іздестіріп жатыр, деп хабарлайды Studentmedia.kz.

Қазақстан Республикасы Білім және ғылым министрлігі Шымкент қаласы мен Түркістан облысының жергілікті атқарушы органдарымен бірлесіп, Арыс қаласындағы оқиғаларды мұқият қадағалап, балаларды қаладан көшіруге және оларды жайластыруға белсенді түрде атсалысады.

Шымкент қаласына ҚР БҒМ Балалардың құқықтарын қорғау Комитетінің төрағасы Ержан Ерсайынов пен ҚР Білім және ғылым министрінің балалардың құқықтары мәселелері жөніндегі кеңесшісі Раиса Шер жіберілді. Оқиға орнында жедел топтар жұмыс істеп жатыр. Қазіргі уақытта ҚР БҒМ өкілдері жергілікті атқарушы органдармен бірігіп, эвакуацияланған балалар тұратын орынды, олардың тамақтануын ұйымдастыру және қауіпсіздігін қамтамасыз ету мәселелерімен айналысады. Сондай-ақ, бұл жұмысқа ҚР БҒМ аумақтық органдары (Түркістан облысы және Шымкент қаласы Білім және ғылым саласын бақылау департаменттері) қосылды.

ҚР БҒМ жіберген хабарламада: «Балалар орналасқан барлық ұйымдар ҚР БҒМ Білім және ғылым саласын бақылау комитетінің бақылауында. Балалар мен ата-аналарды іздестіру үшін ҚР БҒМ Білім және ғылым саласын бақылау департаменті, білім басқармасы және қоғамдық ұйымдар өкілдерінен тұратын мобильдік топтар құрылды», — делінген.

Балалар облыс және Шымкент қаласының білім беру мекемелеріне орналастырылды. Білім басқармасының қызметкерлері үнемі байланыста және сағат сайын жағдай туралы баяндап отырады. Көшіру мәселелерін үйлестіру үшін жедел желі телефондары құрылды:      8-725-33-71-082; 8-725-33-71-313; 8-725-33-71-212; 87014483217 (WhatsApp).

Жергілікті атқарушы органдардың деректері бойынша, балалар мен олардың ата-аналарын көшіру Шымкент қаласында, Түлкібас, Ордабасы, Қазығұрт, Сарыағаш аудандарында жүзеге асырылады.

Ұлттық білім беру деректер қоры ақпараты бойынша Арыс қаласында құрамында 24 201 бала бар 97 білім беру ұйымы (47 мектепке дейінгі ұйым (4 732 бала); 40 мектеп (18 403 оқушы); 1 отбасы үлгісіндегі балалар ауылы (66 бала); 2 колледж (835 оқушы); 6 қосымша білім беру ұйымы, 1 «Көксарай» қала сыртындағы сауықтыру лагері (165 бала (Арыс қаласынан оңтүстікке қарай 77 км) жұмыс істейді.

ЖАО ақпараты бойынша қазіргі уақытта Шымкент, Түркістан қалаларында, Ордабасы, Қазығұрт, Сарыағаш және Шардара аудандарында 47 халықты орналастыру орталығы жұмыс істейді. Барлығы 47 орталықта 4 мыңнан астам адам бар, оның ішінде 886 бала.

ҚР БҒМ БҒСБК, білім беру басқармасы және қоғамдық ұйымдар өкілдерінің ішінен мобильді топтар 945 баланы тауып, ата-аналарына тапсырды, тағы 14 ата-ананы іздестіріп жатыр (биылғы жылдың 24 маусымы, сағат 23:00-ге дейінгі жағдай бойынша). Сондай-ақ, эвакуацияланған балалар үшін психологиялық қолдауды, медициналық сүйемелдеуді, бос уақытты өткізу шараларын ұйымдастыруды көздейтін іс-шаралар кестесі әзірленді.

Жедел әрекет ету мақсатында «BALA QORGAU», «Арыста жоғалған балалар» телеграмм-чаттары жұмыс істейді.

ҚР БҒМ қызметкерлері Арыс қаласының балаларына көмек көрсетуге бір күндік жалақысын аударады.

 

Комментарии:

Добавить комментарий

Ваш e-mail не будет опубликован. Обязательные поля помечены *